Industry ramah mimal ram neia inchhal mi 84 awm; kohhran leh YMA pawh an tel

by Editor

Tualchhung News

ZORAM TODAY| 16th August, 2024 (Fri): RTI Act hmanga Zoram Today in a zawhna ah Industrial Growth Center (IGC), Luangmual ramah VC pass hmangin ram neia in chhal mi 84 lai an awm thu Commerce & Industries department chuan a tarlang.

Industrial Growth Center (IGC), Luangmual hi kum 1989 ah Land acquisition Act, 1984 hmanga din a nih thu department hian a tarlang a. A ram zau zawng hi 766.43 bigha (10,25,470 Sqm) niin Departmental Land Lease (DLL) hmanga pek an ni.

IGC ram-ah hian mimal, kohhran hrang hrang leh YMA te pawhin VC pass hmang hian ram an nei niin department hian a tarlang a, tunah hian Revenue Department nen tangkawpin ram chingfel tur hian hma an la mek a ni. Mimal ram neia in chhal mi 84 te hian kum 1970 atanga 1974 inkar ah VC pass hmangin ram hi an nei niin tarlan a ni.

Mimal ram nei nia inchhal zingah sorkar hnathawk lian, politician langsar leh an chhungte thil ti thei tak tak bakah kohhran hrang hrangte leh YMA te hial an awm avangin chinfel dan kawng zawh a thui dawn niin a lang.

July ni 20, 2024 khan Commerce & Industries Minister F. Rodingliana hovin Industry dept. leh Revenue dept. te chuan Joint Meeting neiin, Industries ram huam chhunga dan lova awmte chu insasengna hun pek ni se, huntiam ral rualin Joint Task Force din ten a hmunah kalchilhin thupek zawmlote zawnchhuahna neih ni se tiin a lo rel tawh a.

He meeting hian document leh pass pe chhuak theitu dik tak (competent authority) in a pekchhuah ni lo hmanga industries ram lo luahte leh allotment hmang diklo te chu rang taka chhuahtir turin chak lehzuala hmalak zel a rel a.

Mi thenkhat industries ram zuar an awm thu leh heng ram te hi lo leisak lo turin mipuite chu fimkhur turin a chah thu meeting thuchhuak hian a tarlang bawk.

He meeting hian Industrial Growth Centre(IGC), Luangmual ram chinfel chu hmalakna hmasaa neih tur anih thu leh a dang pawh rang taka hmalak chhoh zel anih tur thu rel a ni.